Situata me pandeminë është menaxhuar në mënyrë efikase dhe mund të konsiderohet e qetë.

Kështu ka deklaruar Ministri në detyrë i Shëndetësisë Armend Zemaj, i cili ka apleuar që të vazhdohet me disiplinë.

Ministri, Zemaj, ka potencuar se në zonën e kuqe janë Prishtina dhe Fushë-Kosova, mirëpo sipas tij me këto kufizime po pretendohet që të mbahet stabil gjendja, numrin e infeksioneve dhe numrin e rasteve të hospitalizura.

“E kemi një situatë të qetë pandemike. Shqetësimi ka qenë për rastet e reja të cilat kanë rezultuar me Covid-19, por edhe infeksioni i ri, i cili u paraqit në Britaninë e Madhe. Kështu që  në një analizë të saktë, po kërkojmë që të vazhdohet me disiplinë”.

I pari i shëndetësisë, theksoi se janë vënë në dispozicion të gjithë mekanizmat për menaxhimin e variantit të ri të Covid-19, raporton EO.

“IKShPK-ja është vënë në garanci edhe në klinikat tona në izolimin e këtij virusi të ri në aspektin e shpërndarjes kontakteve edhe në aspektin shkencor edhe të trajtimit të saj përmes testimeve kështu që me kapacitete të cilat i kemi shtuar, por edhe me njohuritë e reja të cilat i kanë vetë profesionistët shëndetësor po tregojnë që mund ta mbikëqyrim ta kontrollojmë, por të kërkohet kujdes i shtuar edhe në këtë pjesë”.

“Ne kemi marrë vendime menjëherë për mbylljen e kufijve ajror me Britaninë e Madhe po shpresojmë që në vendet e rajonit mund të marrim masa kufizuese me vendet të cilat mund të paraqesin raste në rritje të këtij variant të virusit. Është vetëm variant që në shpërndarje e ka efektin më të madh. Ndërsa trajtohet njëjtë edhe në aspektin klinik”.

Ai shtoi se jo vetëm për qytetarë, por ka pasur gjoba edhe për partitë politike, andaj ai thotë se duhet të zgjerohet mbikëqyrja në të gjitha qendrat.