Qeveria e Kosovës ka marrë vendim që të kufizojë lëvizjen e qytetarëve mbi moshën 65 vjeç dhe të atyre me sëmundje kronike. Po ashtu, ka pezulluar aktivitetin e çerdheve publike dhe private.

Sipas vendimit të fundit të Qeverisë Hoti, të marrë të hënën, pensionistët dhe të të tjerët me sëmundje kronike do të mund të lëvizin nga ora 5:00 deri në orën 10:00 dhe nga ora 18:00 deri në orën 21:00. Pra, tetë orë gjithsej gjatë gjithë ditës.

“Qytetarët mbi moshën 65 vjeç dhe ata me sëmundje kronike (diabet, hipertensioni arterial dhe sëmundje zemre, sëmundje kronike të mushkërive, pacientët më sëmundje të veshkave, pacientët me imunitet të suprimuar, pacientët onkologjikë etj.) mund të dalin jashtë në ambiente publike vetëm në orët e hershme të mëngjesit nga orës 05:00 deri në orën 10:00 dhe në orët e mbrëmjes nga ora 18:00 deri në orën 21:00”, thuhet në vendimin e Qeverisë.

E pos çerdheve, janë ndaluar edhe aktivitetet sportive e kulturore në ambiente të mbyllura.

“Në vazhdim të masave tjera të luftimit dhe parandalimit të COVID-19, Qeveria ka pezulluar veprimtarin e çerdheve publike dhe private; aktivitetet rekreative, kulturore dhe sportive të mbyllura në të gjithë territorin e Republikës së Kosovës. Janë obliguar të gjitha qendrat tregtare në territorin e Republikës së Kosovës që veprimtarinë tregtare ta ushtrojnë prej orës 05:00 të mëngjesit deri në orën 21:00, duke zbatuar në përpikëri kushtet sipas Manualit për mbrojtje nga COVID-19, e mbi të gjitha mbajtjen e detyruar të maskave dhe krijimin e kushteve për distancë fizike të konsumatorëve”, thuhet në vendimin e Qeverisë.

Po ashtu, janë ndaluar ceremonitë fetare dhe grumbullimet e më shumë se pesë personave në sheshet publike, parqe dhe të ngjashme.

Qeveria është shtyrë të marrë masa për parandalimin e koronavirusit, pasi në javët e fundit është rritur numri i të infektuarve dhe i të vdekurve.

KOSANA

Burimi: Koha.net